داين تدان
هبة الله يوسف محمود سند
كاتبة وفنانة تشكيلية
المستشار الإعلامي بجريدة الهرم المصري نيوز
يوم كنت ماشيه في الطريق
العمر حاني ضهري
قصاد عيوني كوم هموم
وسنيني شريط بيضويّ
قابلني طفل عيونه سود
في الخلا بيجري
رمح عليا كيف الفرس
وضحكته بتِدويّ
قالي يا خاله
ياللي سنين عمرك بانت في شيب شعرك
إنصحيني نصيحة أعيش بيها وتفيدني طول عمري
قولتله والدموع في عيوني كيف المطر ع الأرض يروي
إوعاك ياولدي تجرح عزيز وبعدين تقوله معلش
أصل معلش بعد الوجع و الجرح ماتِطَيبش.
إوعاك تِقَسي القلوب وبعدين تطلب حنان
طلب الحنان بعد القسوة هيتقابل بطول لسان
إوعاك تِشَيّل النفوس وبعدين تطلب صفا.
عمر النفوس ما بتصفا م القسية مش هاتنول إلا الجفا .
إوعاك تبكي القلوب وبعدين تِطبطب عليها.
يابني كسر القلوب وألمها جتتنا ما تحتويها .
إوعاك تخون اللي وثق فيك
وبعدين تطالبه بأمان
مفيش أمان مع حد خان بلا بجاحه وجنان
سامحني ياولدي ..
على قسوة كلامي ومتزعلش ٠٠٠
أنا قصدي أنصحك دي الدنيا دوارة
و النصيحة بعد الغلط قرش براني مهما حاولت هيلف ويرجعلك وماهينصرفش
وداين تدان مهما طال الزمان
ومحدش هيحصد في حياته غير زرعته ولا هيغير اللي حصل وكان .
وفكر مرتين في قولك وفعلك بدل ما ترجع ندمان بعد فوات الأوان .
🔥هہمہسہآتہ حہآئرة🔥
#همسات_حائرة
