الضياع.
بقلم/بدوى العبادى
مرت سنة ورا سنة
وف الزحمة ملقتكيش.
كانت إيدي فى إيدك
خايف عليكي
شيلتك جوة قلبي
ودفيتك بنار الشوق.
وكان حبك كل يوم بيزيد
دمي كان نهرك الجاري
وضلوعي كانت مركبك.
وبرمش عيني رسمتلك
جنة بعود الورد والحنة.
إتعلمت أكون شاعر!!
إتعلمت أعيش الحياة
اللي من غيرك متساويش
عايزك تفتكري ومتنسيش.
إنى سبت الكل عشانك
عشان أيامى تحلالك.
سافرت تعبت وقاسيت.
جبتلك كل غالي وسكنتك أحلى بيت.
وغزلت عقود من اللؤلؤ
تحقق ليكي أحلامك.
لكن قبلنا قالوا إن الحال مابيدومش.
والشمس تطلع لما القمر يمشي.
وما افتكرش!!
إنى يوم زعلتك ولا أهنتك
. لما كنت ببص فى عيونك
دراعي بيقوى على المر.
ولما أتوه فى ليل شعرك
بشوف كل الصعاب سهلة.
لقيت الدنيا دي جاهلة ولا مستهلة.
لقيتك لما مالت الأيام
مليتى إنتي عن حبي.
مشيتى ف زحمة الدنيا
وعلى جرح الفراق نمتي.
كلمة إسمعيها وياريت تفهميها.
اللي تبيع العشرة للي أخلص ليها.
مش هتلاقي حد أبدًا يشتريها.
ليست هناك تعليقات:
إرسال تعليق