( بغار )..
للشاعر الدكتور علي مسلم عجمي
----------------------
بغار من نسمة هوا بكير
تلعب بشعرك عندما تفيقي
و بغار من عطر الورد تا يطير
يشمِّك على السكيت.. و تضيقي
و بغار لما جوقة عصافير
تعزف بإذنك لحن إغريقي
و بغار من كلمات بالتعبير
تدغدغ شفافك قصد تشويقي
و بغار من شرشف من الكشمير
يحضنك.. الشرشف أبد ما تطيقي
و من مخدة بغار منها كتير
خدودك تلامسها و أنا المشتاق
و شو حيلتي من بعد هالتفكير
إلا الغيرة و حلم ما بينطاق
إيدي عخـدي و إبلع بْـريقي
و بغار من نور الصبح ع سرير
يشوفك قبل مني و أنا غافي
و من الشال بغار منو كتير
يلتف حول كتاف هفهافي
و بغار من فنجان قهوة يصير
يلامس شفافك بالمدى القافي
و بغار لما النحل صار يطير
و بدو من شفافك عسل صافي
بغار لما بزحمة الأحلام
تكوني برؤية حلم علقاني
و بغار لما عالهدا الأنسام
تداعب خِصَل شعرك و تنساني
و لولا الغفا جَـرَّب معاكي ينام
و إنتي براحة بال غفياني
بغار منو و بحكمو إعدام
وحدك غفاكي بين أحضاني
الشاعر د. علي مسلم عجمي
لبنان
ليست هناك تعليقات:
إرسال تعليق