(الله يرحمك يابا)
♡♡♡♡♡
بقلم /الشاعر حسن طه /السويس
ياريت أبويا عايش
كنت هتدارى فى جلابيته
ولا كنت شيلت الهم
ولا قاسيت أللى قاسيته
الله يرحمك يابا
ويرحم زمن الطيابا
لو يرجع بينا العمر
من عمرى كنت أديته
راح أللى كان السند
وكنا عليه بنعتمد
منشيلش هم حاجة
راح خلاص للأبد
وبقينا تعساء غلابة
من يوم فراقك يابا
مع ناس زى الديابة
بيهدوا أللى بانيته
ياريت أبويا عايش
كنت هتدارى فى جلابيته
بالدمع ياعينى فيضى
لفراق سر وجودى
من بعدك يابا تايه
مسكين وأنحنى عودى
ونسيت الفرح يابا
وسنين وأيام كأبه
عايش فى سجن حزنى
وشبابى كمان نسيته
ياريت أبويا عايش
كنت هتدارى فى جلابيته
منايا يا ابويا أنى
تكون عليا راضى
حرمانى يابا منك
كسرنى وحطم فؤادى
وبقيت للحزن صاحب
فى زمان مفيهشى صاحب
عليل والوجه شاحب
من كتر أللى عانيته
ياريت أبويا عايش
كنت هتدارى فى جلابيته
الله يرحمك يابا
ليست هناك تعليقات:
إرسال تعليق